Different type of Abortion for Clinic na im dey and dem fit do am for different stage of de belle. Dis page get ogbonge informate wey full ground for each of de procedure.
Wetin be abortion for clinic?
1/ meaning of abortion for clinic
Abortion for Clinic dey safe and e dey work well like 99%. Dem fit use dis abortion method take manage miscarriage and dem go do am inside clinic or hospital by healthcare person wey dem train. 
Wen dem dey do am, the person wey dey do am go use instrument take open de cervix small small and den he go use method of aspiration to take commot de belle from de uterus.
De woman go most likely feel pain for belle wen dem dey do am and blood fit dey come out on and off for some days or weeks after. 
2/ de different method to commot belle for clinic
Plenti safe method dey wey you fit choose from for Abortion for Clinic, and dem depend on how long de belle don dey. Because of magomago wey dey for how long belle don dey for de different ways to commot belle, de decision fit also dey depend on where you dey stay, de equipment wey dey and de healthcare person and your personal choice. , 
- Manual Vacuum Aspiration (MVA) na de type of Uterine aspiration, and you fit use am for belle wey don dey 14 week.
- Electric Vacuum Aspiration (EVA) na de type of Uterine aspiration, and you fit use am for belle wey don dey 15 week
- Dilation and evacuation (D&E) dey for belle wey don 14 weeks
- Induction abortion dey for belle wey don pass 16 weeks
- Dilation and Curettage (D&C) na old method wey (MVA/EVA) and dilation and evacuation (D&E) don replace.
safe2choose endorse Manual Vacuum Aspiration (MVA) for belle wey still dey de first 3 months or early second trimester and we get ogbonge informate wey full ground as e take concern dis method.
3/ To use anesthesia for Abortion for Clinic
Different type of anesthesia na im dey wey dem fit use for Abortion for Clinic and de method wey dem go use am go depend on how long de belle don dey plus whether e dey available for where de clinic wey you go. De possible anesthesia method wey dey be :
- Local anesthetic: dis na de most common type of anesthetic wey dem dey use for Abortion for Clinic. Na medicine wey dem go shuk for your cervix wey no go let you feel pain wen dem dey do de surgery. De woman go still dey awake and alert.
- Moderate/Conscious sedation: dis na anesthetic wey dem go shuk for person vein so dat de woman go dey feel like say she wan sleep. She go dey hear wetin dem dey talk.
- Deep sedation: dis na anesthetic wey dem go shuk for person vein so dat de woman go dey feel like say e wan sleep. She go dey hear wetin dey hear wetin dem dey talk.
- General anesthesia: dis one fit combine anesthetic wey you fit smell and de one wey dem go shuk for bodi to make de woman be like say she sleep go. She no go hear anything.
Wetin be Manual Vacuum Aspiration (MVA) abortion?
Manual Vacuum Aspiration (MVA) dey very safe to commot belle wey still dey first trimester, and/or early second trimester till like 14 weeks sef . How long de belle don reach for person to do dis sugery dey de clinic or de healthcare person hand.
Na person wey dem train go fit do MVA
During de surgery, de healthcare person go use instrument like silent suction device take commot de belle from de uterus . Most of de time, dem dey use local anesthesia do am and de woman go dey awake. E dey take between 5 and 10 minutes. De woman go like feel pain for her belle and she go see blood on and off for some days or weeks after. Look here for more informate.
Wetin be Electric Vacuum Aspiration (EVA) abortion ?
Electric Vacuum Aspiration (EVA) dey very safe to commot belle wey still dey first trimester, and/or early second trimester. Na person wey dem train go fit do EVA.
During de surgery, de healthcare person go use instrument like vacuum suction device take commot de belle from de uterus.
De difference wey dey between EVA and MVA na say light na im dem go use commot de belle. Because EVA need light, e fit no dey available for places were dem no get plenti things. Where e dey available, de healthcare person fit use EVA if de belle don pass 10-12 weeks because he go let de healthcare person do am sharp sharp pass de MVA and de time wey dem take do am go short well well. Anoda difference between EVA and MVA na de noise wey de machine dey make. EVA machine dey make noise because say e dey use light. 
Wetin be Dilation and Evacuation (D&E) abortion?
Dilation and Evacuation (D&E) na very safe method to commot belle wey don pass 14 weeks. To get D&E depend on de law wey concern make person commot belle for different places for de world. For some place, D&E fit dey available for women who wan commot belle for any reason, or e fit be for only women who need to commot belle because e no good for dia health. Ogbonge informate as e take concern laws on abortion matter for different places dey here.
For D&E, dem go make de cervix soft and open am with some kain things wey go help. Dem go don give de thing several hours or several days before dem go do de abortion. De healthcare person wey dem train go use different instrument and vacuum aspiration (EVA) to commot de belle. Dem fit even use ultrasound for de abortion. Dem fit use local anesthetic and/or sedative medicine so dat de woman no go feel anything wen dem dey do am. But all dis go depend on how long de belle don dey. , 
Wetin be Dilation and Curettage (D&C)?
Dilation and Curettage (D&C) na one old method wey dem dey take do Abortion for Clinic. Dem don change am with vacuum aspiration abortion methods. So, e no dey advised make you do am.
Wen dem dey do D&C, dem go make de cervix soft, and den, dem go kon use sharp curettes to scrap de wall of de uterus to take commot de belle. Gbege fit happen well well and de pain eh, no be for here at all. Because of dis, de World Health Organization (WHO) kon say make healthcare people change D&C with vacuum aspiration abortion, D&E, or abortion wit medicine whenever e dey possible. , 
Wetin be Induction Abortion?
Where e dey available, induction abortion be method wey dem fit use wen belle dey de second or third trimester (like 16 weeks or more). Sometimes, dem dey do induction abortion because de belle no good for de woman health. Dis sha depend on where person dey live and de laws wey dey dia area.
Dis method dey wan copy labour, wen you use de medicine, e go make de cervix soft and e go make de uterus to dey shake bodi. As all dis dey happen, de belle go commot. Because dem dey use dis method wen de belle don mature, dem dey always do am for clinic or hospital where de healthcare people fit dey monitor de woman as dem dey do am. Dis method dey need plenti medical things, any extra thing go dey on standby in case dem need am sharp sharp. Dis method no dey too common as na method for belle wey don mature, and e dey take time to do finish. 
How much be Abortion for Clinic?
We no fit talk say na like dis e be, e depend on where you dey live, wetin you go need for de abortion, place wey dem go do de abortion (clinic or hospital), and how long de belle don dey.
Shey Abortion for Clinic dey safe?
Abortion for Clinic dey safe wen na person wey dem train for de matter na im do am. Clinic wey dey do am need to follow de standards and guidelines wey de World Health Organization (WHO) don set. 
De guidelines cover dis matter (but no be only dem dey inside o):
- Who fit do de abortion
- How dem go take manage de medicine matter
- How dem go take clean de equipment
- How dem go take troway de yamayama
- De training and how de healthcare people go take do
Women wey wan do abortion need to make sure say de clinic wey dem choose dey safe and dem dey use de approved methods.
Abortion for Clinic dey work well about 99%. 
Wetin be de gbege wey fit happen if person do abortion for clinic?
Even though abortion for Clinic dey safe wella, e still get some gbege wey fit happen, and dem be: plenti blood go dey come out, infection, wound for de uterus and other organs wey dey around am, make abortion no complete, make de belle no commot finish, and make person die.
Dis kain gbege no dey common if na person wey dem train for dis kain matter na im do am, but e dey important to know wetin you dey carry your head enter wen you wan do surgery abortion. 
Wetin be de wahala wey person fit see when you do abortion for clinic?
Belle pain na one wahala wey dey all de method inside abortion for clinic. Many times, dis belle pain dey disappear sharparly, but some women fit still dey feel am off and on for some days or even weeks sef.
Dem dey always use local anesthesia to commot pain around de cervix area wen dem dey do surgery abortion. 
Many women go see blood and belle go dey pain dem wen dem dey do dey do de abortion for Clinic and after dem don finish am. E dey very common to dey feel different things wen person don finish Abortion for Clinic. If de woman feel like say she need extra help, make she go for counseling. 
Shey abortion for clinic dey pain?
De most common pain wey person fit feel wen dem dey do Abortion for Clinic na de belle pain. Although de belle pain suppose stop sharparly after de Abortion for Clinic, but some women fit still dey feel de pain off and on for some days even weeks sef. How de pain go take strong reach go depend on how long de belle don dey and whether de woman fit hold pain for bodi, you know say people dey feel pain in different ways. 
De care after Abortion for Clinic and de contraception wey person fit use
After doing abortion for clinic, dem dey tell women make dem come back so dat dem go check say everything dey kampe. Although you no need to go, make each woman listen to de advice of her healthcare person.
No medical evidence talk say you fit wait so so so time before you nack, baff, exercise, or use dat pad wey dem dey shuk inside toto. Dem advise say make you hold bodi until de blood stop and den make de woman no put anything inside her toto like de pad wey dem dey shuk inside toto, menstrual cup
No do serious work wey dem dey use muscle do. Each woman go fit go back to dey do her every every as her bodi gree her and each person go dey different.
Before person go commot for clinic, make dem tell de woman wetin she go use so anoda belle no go enter. You fit start de contraception as e dey hot, but, make de woman sidon yarn with her healthcare person so dat dem go know de method wey she like pass. Make de clinic give de woman informate about who to call, chat or send email in case she get concern or question after de abortion. 
Reason wey de woman suppose find medical help be:
- Plenti blood (you use two pads soak inside 2 hours or more)
- Your bodi dey hot like oven (38 degrees Celsius or 100.4 degrees Fahrenheit) for more dan 24 hours after de surgery
- De pain around your pelvis, no be for here o
- You dey feel like say you still get belle (dey feel like you wan vomit, make breast soft etc) 
To find de contraceptive wey go make sense for you, go www.findmymethod.org
 Weitz, T. A., Taylor, D., Desai, S., Upadhyay, U. D., Waldman, J., Battistelli, M. F., & Drey, E. A. (2013). Safety of aspiration abortion performed by nurse practitioners, certified nurse midwives, and physician assistants under a California legal waiver. American Journal of Public Health, 103(3), 454-461. Retrieved from: https://www.ncbi.nlm.nih.gov/pmc/articles/PMC3673521/
 World Health Organization (WHO). Safe abortion: technical and policy guidance for health systems, second edition. 2012. Retrieved from: https://apps.who.int/iris/bitstream/handle/10665/70914/9789241548434_eng.pdf;jsessionid=F77B761669FC579124C1E9CA2CC3CFDB?sequence=1
 Ipas. Clinical Updates in Reproductive Health. 2019. Retrieved from: https://ipas.azureedge.net/files/CURHE19-april-ClinicalUpdatesInReproductiveHealth.pdf